Jannah Theme License is not validated, Go to the theme options page to validate the license, You need a single license for each domain name.

درقد مه هېروئ! / سعدالدين شپون

 

زما په قبر به لاله زرغون وي
خو زما دا خبره مه هېروئ
چې هلته لرې د سیندونو غېږ کې
یو تور ځنګل دی د اغزنو ونو
هغه ځنګل د افغانانو مال دی
چې یې اوبه درنه رالاندې نه کړي

د پنج اوبو کې لاهو شوی ځنګل
ما یې ځونکارې ژامې ولیدلې
چې پرانیستلې دي درقد له پاره
دا پنځه سری ښامار زه پېژنم

لا مازدیګر وي چې په خلکو شپه شي
شپانه په بیړه رمې کور ته بیايي
هر څوک له ګڼو ځنګلو لار چپوي
دا شین ځنګل په ځناورو سپاري

د تورې شپې کیږدۍ چې وغوړیږي
تورې بلاوې په درقد خپرې شي
نهنګان ورو ورو په ساحل ورخیژي
زمري راوځي د ځنګله له تیارو

د سور لنډیو آوازونه راځي
خو سپي له ویرې ځواب نه ورکوي
توره تیاره کې د هر بوټي له شا
د ځناور سترګې رڼې ځلیږي

له هرې ونې نه شېبه په شېبه
د کونګ ویرجنه سانده غوږ ته راشي
له هرې خوا نه خونړي سیندونه
لکه بار شوي اوښان وبړیږي

ما هندوکش په سر مزلونه کړي
شپې مې په سمڅو کې خوبونه کړي
خو د درقد فضا څه بل شانې ده
زه یې په ځان باندې شکمن غوندې کړم

لکه اشنا [ې زه هېر کړی یمه
یو له نظره غورځېدلی ټاپو
د حوادثو په منګلو کې ګیر
له وطنوالو نه په څنګ پاتې دی

زما په قبر به غاټول شین وي
خو زما دا خبره مه هېروئ
چې هلته لیرې د سیندونو غېږ کې
یو تور ځنګل دی د اغزنو ونو
هغه ځنګل د افغانانو مال دی
زما د قبر په غاټول مو قسم
چې یې اوبه درنه رالاندې نه کړي
سعدالدین شپون
۱۹۶۳م ــ درقدر ټاپو، تخار

دا نظم په ۱۹۶۳ کې لیکل شوی، هغه وخت کمونیستان په کابل کې پر مطبوعاتو مسلط وو، کله چې دغه نظم سهواً په (ژوندون) کې نشر شو، د سلیمان لایق تبصره دا وه: «له دې نظم داسې انګېرل کیږي چې ګوندې شوروي اتحاد به د نورو هېوادونو خاورې لاندې کولو ته ایښې وي. حال دا چې د امریکا پر خلاف شوروي اتحاد تر اوسه د چا یوه لوېشت خاوره هم نه ده اشغال کړې.»
درقد د پنج (آمو) په سیند کې پروت ټاپو دی او دا آزاد شعر هماغلته د سنځلو د ځنګله په منځ کې لیکل شوی دی.

Show More

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button