سوډان کې د خوارځواکۍ له امله له ۵۰ زیات ماشومان مړه شوي دي
عزم (چهارشنبه، ۱۰/۳/۱۴۰۲): د سوډان په پلازمېنه خرطوم کې د جګړو له امله لسګونه ماشومان د لوږې او اوبو د نشتوالي له امله مړه شوي دي.
د بريتانيا خبري اژانس رويټرز د راپور له مخې: په یاد هېواد کې د اپرېل له ١٥مې نېټې راهيسې د پوځ او ملېشه ځواکونو ترمنځ په نښتو کې له ٥٠ زياتو ماشومانو چې يوه يتيم خانه کې و؛ د خوارځواکۍ له امله خپل ژوند له لاسه ورکړى دى.
راپور زیاتوي: د جګړې له پیل راهیسې د میوګوما دولتي یتیم خانه کې ماشومان په هرو دریو ساعتونو کې خوړو ته اړتیا لري؛ خو هلته کارکوونکی نشته.
ویل کیږي چې د یادو یتیم خانو کارکونکي په کور کې پاتې کیدو یا کډه کولو ته اړ شوي.
د راپور له مخې، د خوارځواکۍ له امله ډیری مړینې د هغو ماشومانو په منځ کې دي چې عمرونه یې له یو کال څخه کم وي.
ویل کیږی چې یوازې د جمعې په ورځ ۱۳ ماشومان د سختې خوارځواکۍ او د اوبو د کمښت له امله مړه شوي دي.
د يادونې وړ ده چې له تیرې یوې نیمې میاشتې راهیسې په سوډان کې جګړې روانې دي.