ننګرهار کې د هېواد په کچه د کبانو د دانې تولید کارخونه پرانيستل شوه
عزم(پنجشنبه، ۲۷، غبرګولی ۱۴۰۰): د ننګرهار دکرنې، اوبو لګولو او مالدارۍ ریاست وایي، د لومړي ځل لپاره په دې ولایت کې د حبیب حسام شرکت په نوښت، د هېواد په کچه د څه باندې يو ميلیون امريکايي ډالرو په پانګونې د کبانو د دانې توليدي کارخونې په فعاليت پيل وکړ، چې په يو ساعت کې د شل ټنه دانې د تولید ظرفيت لري او په دې سره به د کبانو روزونکو د خوراکې په برخه کې ستونزې هوارې شي.
د یاد ریاست د چارواکو په خبره، په ننګرهار کې د کبانو روزونکو د دانې په برخه کې خورا ډېرې ستونزې لرلې، خو د دې کار خونې په فعالېدو سره به د هغوی ستونزې هوارې شي.
د ننګرهار د کرنې، اوبو لګولو او مالدارۍ رییس انعام الله ساپي وویل، چې د چرګانو د سکټور د پیاوړتیا ترڅنګ د کبانو د سکټور پیاوړتیا د کرنې ریاست له لومړیتوبونو څخه دي او دې برخې ته به لا ډېر کار وکړو ترڅو پرځان بسیا شو. «هېواد ته د کال زرګونه ټنه د کبانو غوښه له بهرنیو هېوادونو واردېږي، چې ورسره میلیونه ډالر له هېواده بهر ځي. په دې برخه کې پانګونه هېواد ځان بسیاینې په لور بیایي. هر کال هېواد ته د ۱۲۰ میليونه امريکايي ډالرو په ارزښت شاوخوا سل زره ټنه کبان وارديږي، چې د دا ډول فابريکو په فعاليدو سره به وطني توليدات زيات شي.»
د ساپي په خبره، د کبانو د بچیو د تولید په موخه یې د عبدالخېلو په فارم کې د کبانو د تکثیري فارم جوړولو چارې په چټکۍ سره روانې دي او کومې هیچرۍ، چې په ټپه ولاړې دې د هغو د فعالولو لپاره هم هڅې روانې دي. «وړاندې تر دې د کرنې ریاست د خپلو همکارو پروژو په مرسته د حبیب حسام شرکت ته د چرګانو د دانې د ټسټ لپاره یو مجهز لابراتوار جوړ کړی و او په راتلونکې کې به له دوی سره له نږدې کار کوو ترڅو د کبانو د دانې د لامعیاري کولو لپاره هم لابراتوار جوړ کړي.»
دغه راز د حبیب حسام شرکت د دانې د برخې مسوول ډاکتر داد محمد درمل وویل، چې حبیب حسام شرکت په درې برخو هیچرۍ یا یورځنیو چرګوړو تولید، د هګيو چرګانو روزنه او د دانې تولېد په برخه کې کار کوي، چې له نېکه مرغه اوس یې د کبانو د دانې د تولید برخه هم فعاله کړه، چې ورسره به د هېواد په کچه د کبانو روزونکو یوشمېر ستونزې هوارې شي.
درمل وویل، چې یاده کار خونه په ساعت کې د ٢٠ مټریک ټنه دانې د تولید وړتیا لري، چې په کې به ٤٠ تنو ته مستقیم او تر ډېرو کسانو ته په غیر مستقیمه توګه د کار زمینې هم برابرې شي .
د حبيب حسام شرکت رییس عزيز الله حسام وويل، چې دوی اړتيا ته په کتلو د هېواد په کچه دغه کارخونه پرانيستله چې ولايتونو سربېره به يې ګاونډیو هېوادونو ته هم صادر کړي.