«اوسمهال ۶.۵ مېلیونه افغانان په نورو هېوادونو کې کډوال دي»
عزم(یکشنبه، ۳۰، غبرګولی ۱۴۰۰): د کډوالو او بېرته راستنېدونکو چارو وزارت وايي، د حکومت د شمېرو له مخې اوسمهال په نړۍ کې شپږ نیم مېلیونه افغانان په نورو هېوادونو کې اوسېږي، چې ډېره برخه یې په پاکستان او ایران کې دي.
د یاد وزارت ویاند اسلام الدین جرآت په کابل کې یوې خبري غونډې ته وویل، په نورو هېوادونو کې د افغان کډوالو سربېره کورني بېځایه شویو په شمېر کې هم زیاتوالی راغلی دی.
نوموړي وویل، سږ کال په ټول هېواد کې شااوخوا ۱۸ زره او ۴۰۰ کورنۍ د جګړو له امله بېځایه شوي دي.: «د روان ۱۴۰۰ کال راهیسې تراوسه شااوخوا ۱۸ زره او ۴۰۰ کورنۍ بې ځایه شوي، که دغه رقم له اوو سره ضرب شي، ۱۲۸ زره او ۸۰۰ تنه کېږي چې د مختلفو عواملو له کبله له لغمان، کندهار، هلمند، فراه، کندوز او یو شمېر نورو ولایتونو څخه د جګړو او ناامنیو له امله بې ځایه شوي دي. موږ هڅه کوو چې دوی ته د مرستندویه موسسو او هم د کډوالو وزارت له خوا مرستې ورسوو.»
د جرآت په خبره، لا هم په پاکستان او ایران کې د افغان کډوالو شمېره لوړه ده او په دواړو هېوادونو کې زرګونه افغانان د اوسېدنې قانوني اسناد نه لري.
ده وویل، کېدای شي د کورنیو بېځایه شویو په شمېر کې زیاتوالی راشي؛ ځکه اوسمهال جګړه د هېواد ګڼو سیمو ته غځېدلې ده او حکومت هره ورځ ګڼې سیمې له لاسه ورکوي.
په هېواد کې بېځایه شوي کډوال هم وايي، چې د حکومت له لوري ورته سمه پاملرنه نه کېږي او اوسمهال له ګڼو ستونزو سره لاس او ګرېوان دي.
هر کال د جون شلمه د کډوالو د نړیوالې ورځې په توګه نمانځل کېږي او افغانستان هغه هېواد دی چې مېلیونه وګړي یې په بهرنیو هېوادونو کې اوسېږي.