کوسټاریکا لومړنی هېواد شو چې ماشومانو باندې یې هم د کرونا واکسین لازمي کړ
عزم (یکشنبه، ۱۶لړم، ۱۴۰۰): که څه هم په امریکا او یو شمېر نورو هېوادونو کې ماشومانو ته د کرونا واکسین ورکولو اجازه ورکړل شوې؛ خو کوسټاریکا لومړنی هېواد شو، چې په رسمي ډول یې کم عمره ماشومانو باندې هم د کرونا واکسین لازمي کړ.
د بي بي سي انګلیسي څانګې راپور څرګندوي، چې کوسټاریکا ماشومانو ته د واکسین رسولو له پاره امریکايي شرکت «فایزر» سره تړون لاسلیک کړی دی.
د تړون پر اساس به هر هغه ماشوم ته واکسین ورکول کیږی، چې عمر یې له ۵ کلونو زیات وي.
په ورته وخت کې د کوسټاریکا د روغتیا وزارت ویلي: په راتلونکي کال کې به د کورنا واکسین په ټولو هېوادوالو لازمي کړي او له مارچ میاشتې وروسته به یې چارې لا ګړندۍ شي.
د یاد وزارت مسؤلین وایي: لازمه ده چې له کرونا وبا نه ماشومان محفوظ شي او هغوی ته هم واکسین ورکړل شي.
بل لور ته بي بي سي وایي: کوسټاریکايي حکومت له فایزر کمپنۍ نه ۳۵۰۰۰۰۰ ډوزه واکسین اخیستی، چې ۴۰ سلنه یې ماشومانو ته ځانګړې شوې.
د معلوماتو پر اساس: کوسټاریکا کې ۵۵ سلنه خلکو د واکسین دوه دوزونه او ۷۰ سلنې یې یو دوز اخیستی دی.
یاد هېواد کې د کرونا ټولې ۵۶۲۳۱۶ پېښې ثبت شوې او ۷۱۳۴ تنه له همدې مرګونې وبا مړه شوي دي.
باید وویل شي چې تر دې دمه ټوله نړۍ کې د کرونا ۲۵۰۲۷۴۳۱۱ مثبتې پېښې ثبت شوې، چې ۲۲۶۵۴۷۱۸۳ تنه ترې رغیدلي او ۵۰۶۰۲۲۷ نور مړه شوي دي.