یونان کې لا هم د ریل ګاډي حادثې له امله د حکومت پر خلاف لاریونونه روان دي
عزم (یکشنبه، د کب ۱۴مه، ۱۴۰۱): درې ورځې وړاندې د اروپايي هېواد یونان د پایتخت او تهیسالونیکي ښار ترمنځ دوو ریل ګاډو خپلو کې ټکر وکړ، چې له امله یې ګڼ شمېر مړه شول.
که څه هم د یادې حادثې درې ورځې تېرې شوې خو ولسي خلک لا هم په ارام نه دي کېناستلي او د حکومت پر ضد یې مظاهرو ته زور ورکړی دی.
د ګارډین انګلیسي ورځپاڼې لیکلي: یاده پېښه کې د لومړي معلوماتو له مخې ۵۷ تنه مړه شوي او له ۸۰ زیات ټپیان دي.
خبر زیاتوي: که څه هم له پېښې سمدستي وروسته د یونان د ټرانسپورټ وزیر استعفا ورکړه؛ خو لاریون کوونکي لا هم غوسه دي او وایي، چې: پېښه کې بې غوري کوونکي مسؤلین باید سزا وویني او حکومت لاس تر زنې پاتې نشي.
دا په داسې حال کې ده چې تازه د یونان لومړي وزیر ویلي: د دواړو ریل ګاډو ټکر انساني غلطي وه، چې باید ومنل شي او د نورو دا ډول پېښو د مخنیوي په اړه اقدامات وشي.
بل لور ته د پېښې عیني شاهدان وايي، چې د دواړو ریل ګاډو له ټکر وروسته ۳ ریل ډبې له پټلۍ لرې وغورځېدې او ۲ کې اور هم ولګېده.
له دې سره دا اندېښنه هم پیدا کیږي، چې ښايي د تلفاتو شمېره لا زیاته شي؛ ځکه په مسافر وړونکی ریل ګاډي کې ۳۵۰ تنه مسافر ناست وو او بار وړونکی ریل ګاډی هم له ډيرو تجارتي موادو ډک و.