بادغیس کې د دوو کورونو د نړیدو له امله اته تنه وژل شوي
د بادغیس ولایت د ابکمري ولسوالۍ کې نن سهار د دوو کورونو د نړیدو له امله اته تنه وژل شوي دي.
د باغیس د والي ویاند ظاهر بهاند وايي، دواړه کورونه د ابکمري په کوچه زرد سیمه کې نړیدلي، چې یو کورکې درې تنه او بل کور کې پنځه تنه وژل شوي دي. د بهاند په خبره، وژل شویو کې ښځې او ماشومان هم شامل دي. نوموړي د کورونو د نړیدو علت د واورو او بارانو له امله بللي دي. د تېرې اوونۍ راهیسې د هېواد په زیاتو ولایتونو کې سختې واورې او اورښتونو نږدې ۱۲۰ تنه وژلي دي او د زیاتو ولایتونو لویې لارې یې هم تړلي دي.
د طبیعي پېښو سره د مبارزې په چارو کې د دولت وزیر ویس برمک تېره ورځ وویل، یوازې په تېرو درې ورځو کې ۱۲۰ تنه د واورې ښوېیدو او اورښتونو له امله وژل شوي دي، چې ډېره مرګ ژوبله په نورستان او بدخشان ولایتونو کې اوښتې ده. همدارنګه د ګډحکومت لومړي مشر اشرف غني تېره شپه په ویډیويي وینا کې وویل، د مرغومي له لومړۍ د سلواغې تر ۱۷ پورې په ټول هېواد کې د طبیعي پېښو له امله ۱۶۰ تنه وژل شوي دي. طالبانو هم له هېوادوالو غوښتي، چې د واورې او بارانونو له امله ځپل شویو کورنیو سره مرستې وکړي او خپله خواشیني یې هم ښودلې ده.
بریالی روان