انګلا مرکل یو ځل بیا د جرمني انتخابات وګټل
د جرمني د یکشنبې د ورځې د انتخاباتو لومړنۍ پایلې ښيي چې د جرمني اوسنۍ صدراعظمه انګیلامیرکل به په څلورم ځل د دغه هیواد صدراعظمه شي.
د انتخاباتو پایلې ښيي چې د مېرمن میرکل په مشرۍ مسیحي محافظه کار د یموکرات یا زوړپال ولسواک ګوند، چې مېرمن میرکل یې مشره ده، څه باندې ۳۲ سلنه رایې ګټلي او تر دې دمه مخکښ دی.
خو د مېرمن میرکل ګوند د جرمني د پارلمان په ملي جرګه کې اکثریت نه دی ګټلی او باید د حکومت جوړولو لپاره له نورو ګوندونو سره ايتلاف وکړي.
د نظرپوښتنو له مخې، چې له رای اچولو وروسته شوې، د مېرمن میرکل سیال ګوند سوسیال دیموکرات، چې مارتین شولتز یې مشر دی، په سلو کې ۲۰ رایې خپلې کړي دي.
د جرمني لپاره الترناتیف، چې ښي پالی او سختدریځی ګوند دی، په سلو کې ۱۳ رایې ګټلې دي او په لومړي ځل په دریم لمبر راغلی دی.