د غزني سوداګر له ښاره د پوځي تاسیساتو ویستل غواړي
عزم: شنبه/۱۳۹۷/۶/۱۷- د ګډو غونډو او رسنیزه هلو ځلو په ترڅ کې د غزني سوداګرو غوښتنه کړې چې هغه حکومتي پوځي تاسیسات دې له ښاره نورو سیمو ته انتقال شي چې د جنګ ګواښ پیښوي او نتیجه کې یې شاوخوا سوداګریز تاسیسات او خلک زیانمن کیږي.
د سوداګرو ترڅنګ ښاریان او په ځانګړي ډول روشنفکران هم د سوداګرو ددې غوښتن ملاتړ کوي او په ډاګه وایي چې امنیه قومنداني، ماموریتونه او نور پوځي تاسیسات دې له ښار بهر سیمو ته یووړل شي.
د غزني تجارت خونه کې د ناستې مهال دوی شکایت کوي چې په تیر پنځه ورځني جنګ کې شاوخوا ۲۰ سوداګریز مارکيټونه، ۳۰۰ دوکانونه او تم ځايونه د اور خوراک شول او عام ولس ته یې د يونيم مليارد افغانيو زيان واړوه.
دوی ددغه اور لګيدنې او ویجاړۍ يو مهم سبب د ښار په تجارتي او هستوګنیزه ساحه کې د امنيه قومندانۍ او نورو پوځي تاسیساتو شتون ښیي.
لدې مخکېو څو څو ځله د غزني خلکو دا غوښتنه کړې وه چې امنيه قومانداني دې د ښار يوې څنډې ته یووړل شي ترڅو د سرکونو د تړلو په وجه ښاريان په تکليف نشي او نه هم په جنګي حالاتو کې ملکي+ مالي تاوان واوړي.
پدې لړ کې، د ښار یو روشنفکر او د سلام پوهنتون استاذ نصیر تره کی ګیله کوي چې بدبختانه د کورنيو چارو وزارت او د سيمه ييزو ارګانونو ادارې دغه غوښتنې ته خاص اهميت ندی ورکړی.
د ښاغلي تره کي په وینا، ددغې غوښتنې نه منلو نتیجه کې هغه څه چې مخنيوی يې شونی وه ونشو او ورسره څنګ کې خلګو ته په ملياردونو افغانۍ تاوان واوښت.
د استاذ نصیر تره کي په ګډون د غزني د تجارت اطاق غړي او ښاریان شکایت کوي چې له جنګ ورسته امنيه قوماندانۍ ته ټولې غځیدلې لارې او مارکیټونه د پخو سیمټي دیوالونو په مټ د چارواکو لخوا تړل شوي، او خلک نشي کولاي خپل کاروبار مخکې يوسي.
ښاغلی تره کی د خلکو په استاځولۍ وایي چې کورنيو چارو وزارت او سیمه ییزو ارګانونو څخه مو جدي غوښتنه دا ده چې امنيه قومانداني دې له تجارتي ساحې د ښار يوې څنډې ته انتقال کړي ترڅو د غزني عام بيچاره خلک خپلو اولادونو ته روزۍ پيدا کولو کې له ستونزو سره مخ نشي.