د جرمني د بهرنیو چارو وزیر بلخ ته راغلی
عزم(دوشنبه، کب ۲۰، ۱۳۹۷ ل): د جرمني د بهرنیو چارو وزیر هایکو ماس نن په یوه ناڅاپي سفر بلخ ته راغلی دی.
د جرمني د بهرنیو چارو وزیر په مزار شریف کې خبریالانو ته وویل، د افغانستان له سفر وروسته غواړي پاکستان ته ولاړ شي.
ده وویل، جرمني د افغانستان دوهم ستر مالي ملاتړ کوونکی هېواد دی او له امریکا وروسته په افغانستان کې ډېر پوځیان لري.
هایکو ماس وویل، جرمني چمتو دی چې د طالبانو په ګډون د افغانستان د سولې د خبرو کنفرانس جوړ کړي او ښکېلې خواوې پکې ګډون وکړي.
جرمني تېره میاشت په افغانستان کې د خپلو پوځیانو ماموریت اوږد کړ.
جرمني اوسمهال په افغانستان کې ۱۲۰۰ پوځیان لري، چې ډېری یې د افغان ځواکونو په روزلو بوخت دي.
ډېری بهرني چارواکي افغانستان ته پټ راځي او رسنۍ او چارواکي ترې هغه وخت خبرېږي، چې کله بېرته تللي وي.