د بهرنیو چارو وزارت د پاکستان د سفارت مرستیال احضار کړی
عزم(چهارشنبه، ۰۷ وری ۱۳۹۸): د افغانستان د بهرنیو چارو وزارت په کابل کې د پاکستان د سفارت مرستیال احضار کړی او هم یې له اسلام اباده خپل سفیر راغوښتی دی.
د بهرنیو چارو وزارت له لوري په خپره شوې خبرپاڼه کې ویل شوي، دغه اقدام یې د پاکستان د لومړي وزیر عمران خان د وروستیو څرګندونو له امله کړی دی.
«د بهرنیو چارو وزارت، د پاکستان د لومړي وزیر د وروستیو نامسئولانه څرګندونو په تړاو چې د سولې د خبرو اترو د بهیر او د مؤقت حکومت د جوړولو په اړه ېې بیان کړي دي، دغه خبرې د پاکستان د لاسوهونکې پالیسۍ او د افغانستان حاکمیت او د خلکو ملي ارادې ته د نه درناوۍ یوه څرګنده بیلګه وبلله. د بهرنیو چارو وزارت په اسلام آباد کې د افغانستان سفیر هم، د نوربحث لپاره کابل ته راغوښتی دی.»
عمران خان د تېرې دوشنبې په ورځ ویلي وو، په افغانستان کې د لنډمهالې ادارې جوړول د افغانستان د ټولو ستونزو د هواري یوازېنۍ لاره ده.
د بهرنیو چارو وزارت ویاند صبغت الله احمدي د عمران خان دغه ډول څرګندونې د افغانستان په چارو کې د پاکستان ښکاره لاسوهنه یاد کړې.
«دا ډول څرګندونې څوم ځل دی چې د پاکستان د صدراعظم لهخوا تکرارېږي. دا ډېره څرګنده مداخله ده او د پاکستان د لاسوهنې د پالېسۍ یوه ښکاره بېلګه ده.»
د احمدي په وینا، کابل ته په اسلاماباد کې د افغان سفیر له ستنېدو او له نوموړي سره تر مشورې وروسته به له رسنیو سره جزئیات شریک شي.