طالبان-امریکایانو ته: سولییز حل ته ژمن یو؛ خو بریدونو ته مو لاس تر زنې نه شو کیناستی

عزم( شنبه ۱۳۹۸ وری ۲۴)

طالبانو د خپلو پیل شویو “الفتح“ عملیاتو په تړاو د امریکایي قوماندان جنرال سکاټ میلر او زلمي خلیلزاد څرګندونو ته توند غبرګون ښوودلی او پر هغوی یې غږ کړی چې “باید دا خبره درک کړي چې دا جګړه د امریکا لخوا پر افغانانو تپل شوې ده.“

طالبانو ویلي، له خپل سر، مال، ناموس، هیواد، دین او حدودو څخه دفاع کول د هر هیواد او انساني ټولنې حق دی، په تیره بیا افغانان په دې کار کې د نړۍ له هر بل هیواد څخه حساس دي او امتیازي حیثیت لري.

اعلامیه زیاتوي،

“ موږ د میلر او خلیلزاد غبرګونونه غندو، دوی د خپلو کړونو ځواب ویلو ته متوجه کوو او د روانو جهادي عملیاتو د اعلان په اړه يې څرګندوني بې ځایه بولو. “

په اعلامیه کې د اعتراض په توګه ویل شوي چې خلیلزاد او میلر د طالبانو عملیاتو ته په داسې حال کې حساسيت ښيي چې د کابل ادارې د اعلان شویو عملیاتو يې بیا ننګه کړې ده.
طالب ویاند ذبیح الله مجاهد ټینګار کړی چي د مذاکراتو روان بهیر او سولیز حل ته ژمن دي خو په وینا یې چې ،

” داسې نشي کولای چې د اشغالګرو او د هغوی د داخلي ملاتړو پوځي عملیاتو او روان وحشت ته لاس تر زني کښیني”.
مجاهد وایي، چې امریکایانو ته یې په پنځه واړو ناستو کې د ملکي تلفاتو د مخنیوي ویلي، خو هغوی یې په تړاو هیڅ غور نه دی کړی.

طالبانو خبرداری ورکړی چې “ دوی (امریکایان) باید د خپل مسئولیت په درک کولو سره خپل بشري جنایات بند کړي، په تیرو ۹ میاشتو کې د امریکايي اشغالګرو لخوا هره شپه د افغانانو په کورنیو حریمونو تجاوز کیږي، هره شپه ګڼ شمیر ښځې، ماشومان او بوډاګان په خوب ویده په شهادت رسیږي او یا لاس تړلي زندانونو ته استول کیږي، هره ورځ د هیواد په مختلفو سیمو کې د بمونو باران دی، کورونه، مسجدونه، مدارس، مکاتب او کلینیکونه ویجاړيږي او د دوی پخپل اعتراف تر ۷۰۰۰ پورې بمونه په دې لنډ وخت کي زموږ پر خاوره غورځول شوي دي.“

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button
%d bloggers like this: