ډاکټر عبدالله: لویه جرګه د افغانستان په ګټه نه ده؛ تحریموو یې
عزم (یکشنبه ۱۳۹۸ وری ۲۵)
اجرائیه رئیس ډاکټر عبدالله نن په یوه اعلامیه کې د راتلونکې لویې جرګې په تړاو خپل دریځ روښانه او په دغه ناسته کې یې خپل ګډون رد کړی دی.
اجرایه ریاست ویلي،د جرګې د ناڅرګندې اجنډا او هغه مسایل چې په کې څیړل کیږي ، په هکله یې له عبدالله عبدالله سره هیڅ کومه مشوره نه ده شوې.
د سولې په برخه کې د اجرائيه ریاست سلاکار حکمت الله حکمت رسنیو ته ویلي، ارګ په خپل سر او پرته له سلا مشورو د مشورتي جرګې چارې پر مخ وړي.
عبدالله ټینګار کړی چې پر یاده مشورتي جرګه بې ځایه لګښتونه کیږي او د هیواد لباره یې کومه ځانګړې ګټه نه تر سترګو کیږي.
دا په داسې حال کې ده چې څو ورځې وړاندې نیویارک ټایمز ورځپاڼې د اجرایه رئیس له قوله خبر ورکړی ؤ، چې نوموړی د دې مشورتي جرګې د رابللو په هکله اندیښمن دی او فکر کوي چې اشرف غني به د راتلونکو ټاکنو لپاره ترې ابزاري استفاده وکړي.
طالبانو هم یاده جرګه دسیسه بللې او له خلکو یې غوښتي چې ګډون په کې ونه کړي.
پر یادې جرګه چې شاوخوا ۵ میلیونه ډالر لګښت راځي، د هیواد له ګوټ ګوټ نه ورته تر ۲ زرو ډیر کسان وربلل شوي دي.
د یادو کسانو پریکړې به یواځې مشورتي بڼه ولري او هیڅ اجرایوي صلاحیت به ونه لري.
د سیاسي چارو.شنونکی نظر محمد مطمئن وایي، ددې لپاره چې د واک خلا ډکه شي، د ګډ حکومت مشرتابه د مشورتي لویې جرګې د لاري کیدای شي د خپل وخت د غځیدو هڅې وکړي، په داسي حال کې چې د ګډ حکومت شریک ډاکټر عبدالله، د ولسمشریزو ټاکنو پېژندل شوی نوماند حنیف اتمر او ډیری افغان سیاستوال د لویې مشورتي جرګې د جوړیدو له تشکل او جوړښت سره، په اوس وخت کې اختلاف کوي. همدارنګه طالبان چې د هیواد نږدې ۷۰ سلنه خاوره په کنټرول کې لري، له خلکو غوښتې چې یادې غونډه کې ګډون ونه کړي.