طالبانو د کابل او پروان د چاودنو مسئولیت ومنلو
عزم(سه شنبه، ۲۶ وږی ۱۳۹۸): نن غرمه مهال په کابل او پروان کې دوه زورورې چاودنې وشوې چې د دواړو مسئولیت طالبانو ومنلو.
لومړی چاودنه یوولس نیمې بجې شاوخوا د پروان مرکز چاریکارو کې د ولسمشر غني د کمپایني غونډې ته څیرمه وشوه چې لسګونه کسانو ته پکې مرګ ژوبله واوښته.
د پروان د چاودنې په اړه د کورنیو چارو وزارت ویاند نصرت رحیمي ویلي چې چاودنه د پولیسو تربیوي مرکز په لومړي نظام قراول کې د یو سرتیري برید له امله رامنخته شوې چې په موټرسایکل سپور وو او دغه سیمه کې یې چاودنه وکړه.
نوموړي د چاودنې د تلفاتو په اړه څه نه دي ویلي خو د دغه ولایت د روغتیا ریاست رئیس ویلي چې د چاودنې له ځای یې ۲۴ جسدونه او ۳۱ ټپیان وروړي دي.
طالبانو د دغه برید مسئولیت منلی او ادعا یې کړې چې د کابل ادارې د ریاست جمهوري ځانګړي ګارد، استخباراتو او د قطعه خاص په هغو عسکرو یې د نثار احمد په نوم یو تن سرتیري بریدګر ملګري برید کړی دی چې د پولیسو د تعلیمي مرکز په لومړي نظام قراول کې سره راټول شوي وو.
طالب ویاند ویلي چې په دغه برید کې ۲۸ تنه د ملي امنیت، قطعه خاص او ریاست جمهوري د ګارد غړي پکې وژل شوي او لسګونه نور ټپیان دي.
دوهمه چاودنه د کابل ښار نهمې امنیتي حوزې اړوند د امریکا سفارت ته څیرمه د دفاع وزارت د پیژنتون په مرکز کې شوې چې مرګ زوبله یې اړولې ده.
طالبانو همدا راز د دغه برید مسئولیت هم منلی او ادعا یې کړې چې برید یې د دفاع وزارت د پیژنتون ریاست په دروازه کې په راټولو شویو افسرانو او عسکرو کړی چې لسګونه افسرانو او عسکرو ته یې مرګ ژوبله اړولې ده.