مالیې وزارت: راټوله شوې مالیه شفافه ده
عزم(یکشنبه، ۲۰سلواغه، ۱۳۹۸ل): د مالیې وزارت د عوایدو او ګمرکونو مرستیال محمد عیسی قدرت وايي، په هېواد کې مالیات د مالیاتو له قانون سره سم چې له ۱۳۹۴کال راپدې خوا نافذ دی، راټولېږي.
قدرت د هغو بنسټونو ادعاوې رد کړې، چې ګوندې د مالیې وزارت د مالیې راټولو بهیر روڼ نه دی او درغلي پکې کېږي.«هېڅ مالیه، د مالیاتو قانون له چوکاټ څخه بهر نه ده راټوله شوې. مالیې وزارت، په ځانګړې توګه د عوایدو او ګمرکونو معینیت، له فساد سره د مبارزې، اصلاحاتو او شفافیت په رامنځته کولو او د مالیاتو په ټولو برخو کې د قانون په یوشان پلي کولو سره، توانېدلی دی چې مالیات په سمه توګه راټول کړي.»
د افغانستان د سوداګرۍ او پانګونې خونې مرستیال محمد یونس مومند وايي، چې څو ورځې وړاندې مطبوعاتو د هغه او د سوداګرۍ او پانګونې خونې له قوله، د مالیاتو د دوه برابره کېدو خبر ورکړی دی.
دی وايي، د ده خبرې تحریف شوي او له پنځه کلونو راهیسې مالیات له نافذ قانون سره سم راټولېږي او په کچه کې یې هېڅ زیاتوالی نه دی راغلی.
د مالیې وزارت داسې مهال دا سپیناوی ورکوي، چې افغانستان هر کال د اداري فساد په برخه کې لومړی، دویم، درېیم او څلورم ځای خپلوي.
افغان حکومت اوس هم د نړۍ د فاسدو هېوادونو په سر کې دی، چې ډېر فساد یې هم په ګمرکونو او نورو عایداتي ادارو کې کېږي.