طالبانو لغمان ولایت کې له عام ولس سره د امریکایانو د وتلو تړون په جشن ولمانځه
عزم(سه شنبه، ۱۳ کب ۱۳۹۸): طالبانو له امریکایانو سره د وتلو تړون د هیواد په بیلا بیلو ولایتونو کې ولمانځه، خو لغمان کې یې په دې اړه یوه لویه غونډه جوړه کړې وه چې خبریالان یې هم وربللي وو.
دغه غونډه د لغمان په الینګار ولسوالۍ کې جوړه شوې وه چې زرګونه ولسي خلکو او طالبانو پکې ګډون کړی وو.
طالبانو بیا ویلی چې د پوهنې مسوولینو له لوري یې د لغمان ولایت د بادپښ، علیشنګ، علینګار او دولت شاه ولسوالیو په بیلابیلو سيمو کې د ”امریکایي اشغالګرو“ د وتلو د تړون په اړه سترې غونډې ترسره کړې.
غونډه کې د طالبانو د مشر شیخ هبة الله اخوندزاده پیغام هم ولوستل شو، عامو خلکو په خورا جوش سره ولمانځله او د کب لسمه یې چې له امریکایانو سره طالبانو د وتلو تړون لاسلیک کړ له ویاړ ډکه ورځ وبلله چې باید په ټول هیواد کې ولمانځل شي.
غونډه کې ولسي وګړو د طالبانو د سر ښندنو او قربانیو ستاینه وکړه او دغه بریا یې د ټول هیواد بریا یاده کړه او زیاته یې کړه چې همدغه طالبان وو چې افغان ولس ته یې لوی افتخارات ور په برخه کړل.