نورستان کې يو اربکی قومندان او ننګرهار کې دوه عسکر له طالبانو سره يو ځای شوي
عزم (دوشنبه، ۱۹غبرګولی، ۱۳۹۹): طالبنو ويلي پرون يکشنبه د نورستان ولايت اړوند دواب ولسوالي کې د اربکيانو یو تن ځايي عمومي قومندان له دوی سره يو ځای شوی.
طالب وياند ذبيح الله مجاهد پر خپله ټويټر پاڼه ليکلي:
“تیره ورځ د نورستان ولایت دوآب ولسوالۍ بجګل سیمه کې د شفیع په نوم د اربکیانو عمومي قومندان د حقائقو په درک کولو او د جلب و جذب مسئولینو په هلو ځلو سره له خپلې دندې لاس په سر او له مجاهدینو سره یوځای شو.
مسئولینو یې هرکلی وکړ.”
همداراز د يو بل خبر له مخې د ننګرهار ولايت په شېرزادو ولسوالۍ کې هم د کابل ادارې اړوند دوه تنه عسکر له طالبانو سره يو ځای شوي.
ښاغلي مجاهد پر خپله ټويټر پاڼه ليکلي:
“نن ورځ د ننګرهار ولایت شیرزادو ولسوالۍ په مربوطاتو کې د کابل ادارې ۲ تنه عسکر (روح الله او عبدالغفور) د حقائقو په درک کولو سره له خپلو دندو لاس په سر او مجاهدینو ته راغلل.
د جلب و جذب مسئولینو یې هرکلی وکړ.”
د يادونې وړ ده چې د طالبانو له خوا د عمومي عفوې تر اعلان وروسته تقريبا هره ورځ، د کابل ادارې اړوند ګڼ شمېر لوړ رتبه او ټيټ رتبه عسکر له طالبانو سره يو ځای کيږي.