اجل د رقيب راغى چې سپين توغ وهي وزرې/ صابر جان محصل

 

شبګير وهلې سترګو ته خوبونه به راځي
له ستړي  سفر وروسته منزلونه به راځي

د هجر شپه سبا ده د وصال سپيدي چودلې
د سپين سبا عاشق ته وصالونه به راځي

له غيږي د خزانه بياد يار تر غيږي تګ دى
د خار تر پړاو شاته سره ګلونه به راځي

خزان کډه تړلې اوښان بار د قافلي دي
د هيلو غوټۍ ګل شوي بهارونه به راځي

د ظلم توره شپه ده ترږمۍ ده؛ لاره ورکه
د عدل سپين امام بل  مشالونه به راځي

د جهل نابينا سترګي بينا په حقيقت شوي
په سترګو د شبکورو ديدنونه به راځي

اجل د رقيب راغى چي سپين توغ وهي وزري
تر سپين بيرغ نه لاندي ولسونه به راځي

شل کاله مو روژه وه په اميد د يوي ورځي
د قدر شپي راغلې اخترونه به راځي

د ميني په دنيا  کي زه مين په ازادى يم
صابر په زړه زخمي يم ټکورونه به راځي

Show More

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button