غني: د ملکي تلفاتو هره ادعا دې په شفافه او هراړخیزه توګه وارزول شي او جدي اقدامات دې وشي
عزم دوشنبه ۶زمری، ۱۳۹۹):وروسته تر هغه چې یوناما راپور خپور کړ چې ګواکې تیرو شپږو میاشتو کې په زرګونو ولسي افغانانو ته مرګ ژوبله اوښتې او د ۲۳سلنې تلفاتو عاملین یې دولتي عسکر یاد کړل؛ تازه له ارګ څخه په دې هکله یوه خپره شوې اعلامیه کې دا تلفات غندل شوي دي.
ارګ ویلي چې د حسن نیت او جنګ پای ته رسیدو پخاطر یې تر اوسه ۴۴۰۰طالب بندیان له بنده آزاد کړي، خو دا یې نه دي روښانه کړېچې پاتې ۶۰۰ولې نه آزادوي؟
ارګ هم د ملکي تلفاتو پړه پرطالبانو او نورو ګروپونو؟ ور اچولې او ټينګار یې کړی چې اعلی سرقومندان “اشرف غني”ته ملکي تلفات قطعاً د منلو وړ نه دي.
اشرف غني ویلي« د دې د مخنیوي او د خلکو د سر او مال د خوندیتوب په موخه دې د ملکي تلفاتو هره ادعا په شفافه او هراړخیزه توګه وارزول شي او جدي اقدامات دې وشي.»
د یادونې وړ ده چې ارګ په تیرو څومیاشتو کې د دولتي عسکرو لخوا د ملکي تلفاتو په اوښتو چوپ وه او په ځانګړې توګه یې په هرات، هلمند او نورو ولایاتو کې ملکیانو ته د اړول شوې مرګ ژوبلې په هکله هیڅ راز غبرګون نه دی ښوودلی؛ چې د شنونکو په باور اوسمهال د ارګ له آدرسه دا ډول اعلامیې دا جوتوي چې د ارګ چارواکو د بهرني فشار په مټ پر ملکیانو د خواشيني ښودلو جسارت کړی دی.
د یوناما راپور چې طالبان په کې د ۴۳سلنې ملکي مرګ ژوبلې عاملین بلل شوي، د طالبانو لخوا رد شوی او ویل شوي دي چې «په هیواد کې د ملکي تلفاتو اصلي او عمده عامل په عامه کلیو او کورونو او ملکي ځایونو باندې ړندې بمبارۍ او همدا راز د توپونو او هاوانونو اورول دي چې د هلمند ولایت د سنګین ولسوالۍ وروستۍ پيښه يې ښه بیلګه ده او دا ډول کارونه د کابل ادارې د عسکرو او د هغوی د بهرنیو ملاتړو لخوا ترسره کیږي»
طالبان وایي: «مونږ پوهیږو چې د یوناما راپور د کابل ادارې د استخباراتي ارګانونو او همدا راز د بهرنیو ځواکونو له قومندانۍ سره په هماهنګي کې ترتیبیږي چې طبعا د هغوی په مزاج او خوښه خبرې په کې ځایږي او د ملکي تلفاتو غوندې کاملا بشري موضوع سره سیاسي چلند او تبلیغاتي برخورد ته لاره هواروي»
د طالبانو اعلامیه کې راغلي؛ د ملکي تلفاتو د مخنیوي لپاره ښه او مؤثر ګامونه هلته اخیستل کیدی شي چې هغه نهادونه چې ځان بې پرې بولي واقعا د بشري همدردۍ له مخې د ملکي تلفاتو په قضیه باندې تمرکز وکړي،« نه داچې له دې موضوع څخه د یوجهت د ملامته ښودلو لپاره سیاسي استفاده وشي او د پروپاګند لپاره توکي برابر کړل شي»
د یوناما د راپور له مخې د ۲۰۲۰ کال په لومړیو شپږو میاشتو کې له ۱،۲۸۰ زیات ملکي وګړي وژل شوي او ۲،۱۷۶ نور ټپیان شوي دي
په راپور کې ویل شوي چې د اوښتې ملکي مرګ ژوبلې ۴۰ سلنه ښځې او ماشومان دي چې د روان میلادي کال په ۶ میاشتو کې ۱۳۸ ښځې وژل شوې، ۲۵۹ ټپیانې شوي او همدارنګه ۳۴۰ ماشومان وژل شوي او ۷۲۷یې ټپیان شوي دي