د افغانستان ـ ازبکستان ترمنځ تړل شوې پوله پرانیستل شوه
عزم (شنبه، ۲۶، تله، ۱۳۹۹ل): د بلخ ځايي چارواکي وايي، د افغانستان ـ ازبکستان ترمنځ تړل شوې پوله د دواړه لوریو د خلکو د تګ راتګ پر مخ پرانیستل شوه.
د بلخ د والي ویاند منیر احمد فرهاد وايي، د کرونا وبا له امله دغه پوله له تېرو څو میاشتو راهیسې تړل شوې وه، چې نن یو ځل بیا پرانیستل شوه.
د فرهاد په خبره، اوسمهال یوازې هغه خلک پر دغه پوله تګ راتګ کولی شي، چې پاسپورټ ولري او هم د کرونا کومې نښې ونه لري.
دی وايي، په حیرتان بندر کې ازبکستان ته ټول اوښتونکي مسافر معاینه کېږي او د کرونا د پایلې له معلومولو ورسره ورته د تګ اجازه ورکول کېږي.
د کرونا له امله افغان حکومت له ټولو ګاونډیو هېوادونو سره خپلې پولې تړلې وې، خو اوسمهال له ګڼو هېوادونو سره تګ راتګ پیل شوی دی.