خوست: ځانګړو ځواکونو د تلفاتو تر ګاللو وروسته ۴ولسي وګړي وژلي
عزم(دوشنبه،۱۲، لړم ۱۳۹۹: راپورونه وایي چې تیر ماخوستن مهال د خوست ولایت د صبریو ولسوالی اړوند د “نوري” په نامه کلي کې ځانګړو “ضربتي” ځواکونو ته د عملیاتو پر مهال مرګ ژوبله اوښتې چې وروسته یې خپل کسات له ولسي خلکو اخیستی دی.
ځایي خلک وایي، لومړی په سیمه کې د “ضربتي” عسکرو دوه رینجر موټر چې غوښتل یې سیمه کې عملیات ترسره کړي، د ځای پر ځای شويو ماینونو ښکار شول چې په ترڅ کې یې ۶تنه ضربتي عسکر ووژل شول.
خلک وایي چې د ماین له چاودنې او تلفاتو تر ګاللو وروسته یادو عسکرو د ولسي خلکو پر کورونو برید وکړ چې په ترڅ کې یې د ولسي جرګې د پخواني وکیل امیرخان د زوی په ګډون ۴ولسي کسان ووژل شول.
تر اوسه ځایي امنیتي چارواکو او طالبانو په دې هکله کوم غبرګون نه دی ښوودلی.