کرنې وزارت: سږ کال په هېواد کې د کبانو د روزنې ۳۵۰نوي فارمونه جوړشوي
عزم(دوشنبه، ۱۰، لیندۍ ۱۳۹۹): د کرنې، اوبو لګولو او مالدارۍ وزارت وايي، سږ کال د هېواد په ۳۴ ولایتونو کې د کرنې وزارت او خصوصي سکټور له لارې د کبانو ۳۵۰ تولیدي او تکثیري فارمونه جوړ شوي دي.
له یاد وزارت څخه په خپره شوې خبرپاڼه کې ویل شوي، د کرنې وزارت د بڼوالۍ او مالدارۍ ملي پروژې له خوا د کب روزنې ۱۰۰فارمونه او په ورته وخت کې د خصوصي سکټور له خوا د کب روزنې ۲۵۰فارمونه جوړ شوي دي.
«د کرنې وزارت د بڼوالۍ او مالدارۍ ملي پروژه د کب روزنې ۱۰۰ نوي فارمونه چې په کې د کبانو د بچیو دوه تولیدي فارمونه شامل دي د کونړ، بلخ، بغلان، لغمان، کندهار، خوست او هرات په ولایتونو کې جوړ کړي دي، چې تولیدي فارم یې د ۲.۷ مېلیونه بچیانو د تولید وړتیا او تکثیري فارمونه یې د کبانو د دوه مېلیونه او ۴۰۰ زره بچیانو وړتیا لري.»
د خبرپاڼې له مخې، سږ کال به په هېواد کې د کبانو د تولید کچه هم د پرو سږکال په پرتله یو زر او ۵۰۰ټنه زیاته وي، چې پرو سږکال د کبانو د تولید کچه نږدې ۱۰زره ټنو ته رسېده، خو سږ کال به ۱۱زره او ۵۰۰ ټنه وي.
له تېرو څو کلونو راهیسې د هېواد په ګڼو ولایتونو کې د کبانو سلګونه فارمونه جوړ شوي، چې تر یوه بریده یې د هېوادوالو اړتیاوې پوره کړي دي.
اوس هم هېواد ته هر کال زرګونه ټنه د کبانو غوښه له بهره واردېږي.
د کرنې وزارت د معلوماتو له مخې، هڅه کوي په راتلونکو پنځو کلونو کې د کبانو د غوښې له پلوه خپلې اړتیاوې پوره کړي او په دې برخه کې افغانستان پر ځان بسیا کړي.