خپل وطن او خپل اختیار/جواس سودایي

جواس سودايي

خپل وطن او خپل اختیار غواړي دا خلق
اسلامي حکومت په جار غواري دا خلق

وږي ښه دي نه ماړه په غلامۍ کې
ازاد ژوند د افتخار غواړي دا خلق

د پردیو نوکران یې په کار  نه دي
په خپل ملک خپل اقتدار غواړي دا خلق

چې پالنه د ګلانو رښتیا وکړي
یو صادق غوندې مالیار غواړي دا‌خلق

لاس تر زنې به ترڅو وي د جنګ لور ته
دې هیواد کې کسب و کار غواړي دا خلق

ټول د سولې ارمانجن دي جنګ دې ورک شي
ناقرار دي اوس قرار غواړي دا خلق

پاک قران حاکموي دا یې ارزو ده
د عمر په لار رفتار غواړي دا خلق

زورواکي له منځه وړي دا یې هدف دی
ورک له بیخه استعمار غواړي دا خلق

چې دنیا یې تماشه د حریت وکړي
سودایي داسې بهار غواړي دا خلق

Related Articles

ځواب دلته پرېږدئ

ستاسو برېښناليک به نه خپريږي.

Back to top button
%d bloggers like this: