بلخ کې طالبان او حکومت یو بل ته د سترې مرګ ژوبلې اړولو دعوې کوي
عزم(پنجشنبه، ۲۲ سلواغه ۱۳۹۹): دفاع وزارت ادعا کړې چې تیره ورځ یې د بلخ ولایت په چهاربولک ولسوالۍ کې د هوایي بریدونو په ترڅ کې د طالبانو دوه مرکزونه په نښه کړي.
د دفاع وزارت له لوري په خپره شوې خبرپاڼه کې راغلي چې په دغو بریدونو کې ۵۶ تنه طالبان وژل شوي او ۲ ډیپوګان یې له منځه تللي، خو ازادې او ځایي سرچینې بیا دغه شمیره نه تاییدوي.
بل لور ته طالبانو ادعا کړې چې تیره ورځ یې د بلخ ولایت چهاربولک ولسوالۍ اړوند سبوس خورو، هزاره قشلاق او تیمورک سیمو کې د بلخ جوزجان په عمومي لاره د عملیاتي قوې په کتار برید کړی چې ترڅ کې یې ۳ ټانګونه یو موټر له منځه تللي، د ۳ کمانډویانو په ګډون ګڼ عسکر وژل شوي او یو شمیر نور ټپیان کړي دي.
طالبانو د ځینو ویشتل شویو تانګونو انځورونه هم نشر کړي چې ښیي په راکټ یا بله غټه وسله لګیدلي او د اور لمبې پرې راتاو دي.
په ورته وخت کې طالبانو ادعا کړې چې د ننګرهار په شیرزادو ولسوالۍ کې ۲۰ تنو عسکر او پولیس وژلي او یو شمیر نور یې ټپیان کړي دي.