په هلمند کې د شفتالو حاصلات ډېر شوي

عزم(سه شنبه، ۱۴، غويي ۱۴۰۰): د هلمند د کرنې، اوبو لګولو او مالدارۍ ریاست چارواکي وایي، چې په دې ولایت کې د شفتالو حاصلات زیات شوي او د کمیت او کیفیت له پلوه یې مېوه ښه ارزول شوې ده.

د هلمند د کرنې رییس زلمی الکو وایي، چې د دې ولایت په ۱۳۲ هکټاره ځمکه کې د شفتالو بڼونه جوړ شوي دي، چې په في هکټار د ۱۵ ټنه حاصلاتو په اټکل سره د دې ولایت د شفتالو سږني حاصلات به ۱۹۸۰ مټریک ټنه وي.

د الکو په خبره، په ۱۳۹۹یم کال کې شاوخوا په ۴۰۰ جریبه ځمکه کې د مېوو نوي بڼونه په دې ولایت کې جوړ شوي دي، چې زیاته برخه یې د شفتالو بڼونه دي. «بزګرانو ته عامه پوهاوی ورکول، د ناروغیو میخانیکي مخنیوی، ښه هوا او له بڼونو څخه په فني توګه څارنه او ساتنه هغه عوامل دي، چې ددې ولایت د شفتالو حاصلات زیات شوي او پر وخت بازار ته وړاندې کولو ته چمتو شوي دي.»

دی وايي، د هلمند د کرنې اداره هلې ځلې کوي، چې د هلمند کورني محصولات پیاوړي کړي، بزګر په پښو ودروي او د دې ولایت د کرنیزو محصولاتو د کمیت او کیفیت کچه لوړه کړي.

روانه اوونۍ د ننګرهار ځايي چارواکو هم ویلي وو، چې په دغه ولایت کې د پرو سږکال په پرتله سږ کال د شفتالو حاصلات ښه شوي دي.

له تېرو څو کلونو راهیسې د هېواد په ګڼو ولایتونو کې د شفتالو بڼونه رواج شوي، چې هم ښه حاصلات ورکوي او هم یې ونې ژر مېوه نیسي.

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button
%d bloggers like this: