نور کولی شئ فیسبوک او انسټاګرام کې خپل لایکونه پټ کړئ
عزم (سه شنبه، ۱۱غبرګولی، ۱۴۰۰): ښایي تاسې هم یو له هغو یاست چې د ټولنیزو رسنیو په مهمو اپلیکېشنو (فیسبوک اوانسټاګرام) کې به له پوسټ کولو وروسته د زیاتو خوښونو (لایکونو) غوښتونکي یاست؛ خو ایا خبر یئ، چې نور به خلک کولی شي خپل لایکونه پټ کړي.
د انسټاګرام اداره وايي: د روانې اونۍ له پیل سره سم د انسټاګرام کارونکو ته د خپلو لایکونو د پټولو اجازه ورکړل شوه.
ویل کیږي، چې د لایکونو پټولو اپشن باندې له ۲۰۱۹ کال راهیسې کار روان و، چې اوس یې عملي بڼه خلکو ته د کارونې له پاره وړاندې شوې.
بل لور ته د فیسبوک اداره وايي: ځینو خلکو د فیسبوک او انسټاګرام د لایکونو پټولو پالیسي ستایلې؛ خو ځینو نورو بیا نه ده خوښه کړې.
د راپورونو له مخې: په فیسبوک کې د لایکونو نه ښودلو اپشن نه دی فعال شوی؛ خو د انسټاګرام کارونکي کولی شي چې له هر پوسټ وروسته د لایک اپشن په خوا کې لیکلي دری مسلسل ټکي (ډاټ) کلیک کړي او د خپلې خوښې وړ لایکونه پټ او پاتې د خپلو ملګرو په مخ کې پریږدي.
دا په داسې حال کې ده چې څه موده وړاندې د انسټاګرام مشر ایډم موسیري وویل: د لایکونو په پټولو سره د ځینو خلکو ذهني نا ارامي او ډپرېشن له منځه تللی شي.
خو ځینې خلک نیوکې کوي چې د لایکونو پټېدل به خلک له ستونزو سره مخ کړي او د پوسټونو موثریت او لیوالتیا به له منځه یوسي.
باید وویل شي چې د لایک اپشن له تېرې یوې لسیزې راهیسې په فیسبوک او له څو کلونو راهیسې په انسټاګرام اپلیکېشن کې نصب شوی دی.